مناديل يابيه

– مناديل ، تاخد مناديل يا باشا؟

هزّيت راسي وطلّعت الفلوس من جيبي والبنت ناولتني علبة المناديل.

– بتبصي على أي؟

– ده تلفون أبو زراير بكاميرا صح؟

ابتسمت وأنا براقب علامات إعجابها – أها .

اتكلمت بحماس – أمي قالتلي لما تكبري وتبقي شاطره في المدرسه هجبلك واحد زيّه .

– طب ده شئ جميل وأنتِ لازم تذاكري وتشدي حيلك في مدرستك علشان مامتك تجيبلك التليفون .

ابتسمت ببراءة أطفال – مانا مش بروح المدرسه .

عقدت حواجبي باستغراب – ليه أنتِ عندك كام سنه؟

بدأت تعد على أيديها وبعدين حطتهم قدامي فعرفت إن عندها تسع سنين .

– مدخلتيش ليه المدرسه؟

– علشان معنديش شنطة وكراسات ولا فلوس أقدم بيها المدرسه.

– ….

سؤالها خرجني من صمتي – أنتَ في مدرسه؟

– أها في تالته ثانوي .

– ممكن أطلب منك طلب؟

اتكلمت بسرعه – أها طبعاً ، عاوزه فلوس؟

هزّت راسها بالنفي – لا لأ أنا كنت عاوزه أقولك حاجه تانيه .

ابتسمت وبَصيتلها – قولي .

– ممكن تذاكر جامد أوي وتبقى شاطر علشان تساعدني أنا وأخواتي اللي في الشارع نتعلم ويبقى عندنا بيت ومدرسه ؟ ممكن تذاكر وتنجح علشان تساعدنا إحنا اللي ملناش حد يساعدنا؟ إحنا كمان عاوزين نروح المدرسه ونتعلم و نقرأ ونكتب ، الجهل وحش يا باشا والفقر بيقتلنا كل يوم.

على الرغم من إنها صغيرة أوي على الكلام ده إلا أنها قدرت توصله وتقوله بكل تأثر لدرجة مَحسيتش بنفسي غير وأنا ببكي وبَوعدها .

– صدقيني أنا هعمل كل جهدي في إني أوصل صوتك وصوت كل طفل زيّك وفي يوم هقف وأطالب بحقكم في التعليم .

ابتسمت – وَقتها هعرفك بس أنتَ هتعرفني إزاي؟

– مش عارف ، أنتِ عندك فكرة؟

فكّرت شوية بعدين اتكلمت – النهارده كام؟

بَصيت في تليفوني ورجعت قولتلها التاريخ – 2 فبراير 2002 م.

– بعد عشرين سنه هيبقى التاريخ كام؟

ردّيت عليها – 2 فبراير 2022 م .

ابتسمت – نفس اليوم ونفس المكان بعد عشرين سنه نتقابل هنا ووَقتها لو أنا مَجيتش تعرف إني فارقت الدنيا لكن لو جيت فأنا عاوزاك توفي بوعدك ليا .

ابتسمتلها بإعجاب – وأنا قبلت التحدي وهتحدى الوَقت والزمن والظروف في سبيل أوصل صوتك يا … ألا صحيح أنتِ اسمك أي؟

ابتسمت هي وبتقول اسمها بعد ما لَمحت الإشارة بتفتح وبتجري ناحيتها – اسمي رؤية .

ابتسمت وأنا بردد اسمها – رؤية