مناديل يابيه
قاطع شرودي رنة تليفوني – ألو .. لأ خلاص يا ماما مش هقسم السنه وهحاول ألحق اللي جاي من الشهور والأيام وألم المنهج .
جاني صوتها من على التليفون – أي غيّر رأيك ؟
ابتسمت وأنا بلمح طيفها على الناحية التانيه من الطريق – رؤية يا ماما .. رؤية هتغيّر مستقبل التعليم في مصر مش بس مستقبلي.
قفلت مع ماما ووَقفت وابتسمت بعد ما عرفت أي هي خَطوتي الجاية وهتبقى أي وفين ومجهودي لازم يتحط فين .
– والآن اسمح لي سيادة الرئيس أن أقدّم لكَ مَشروعي الذي لطالما سَعيت لتحقيقه منذ أن كنت مراهقاً في الثانوية العامه وحتى وصولي لكرسي وزير التربية والتعليم ، مَشروع فيه ينص على أن كل طفل على أرض الوطن له الحق في التعليم كما له الحق في العيش على أرض الوطن ، فلا عيش بلا تعليم ولن يتقدم التعليم ولازال أبناء العشوائيات والمتشردين يعانون من الفقر وعدم القدرة على المطالبة بحقهم في التعليم .
بدأت أقدّم مشروعي واللي فيه هتكون كامل مَصاريف أي طالب تحت خط الفقر مجانية بالإضافه لصرف مبلغ مالي شهري من خزنة الدولة للمتشردين وأطفال الشوارع وذلك بالتعاون مع وزارة الإسكان بتوفير سكن لهم ومنه نهدم العشوائيات ونستصلح الأراضي في خدمة الدولة ومعاً نحو رؤية مصرية جديدة .
وَقف الرئيس على المنصه وأنا قلبي بيدق بعنف ، خوفت كل تعبي السنين دي كلها وبعد رفض المشروع لأكتر من عشرين مرة وأخيراً قدرت أوصل وأتكلم عنه قدام الرئيس فيقوم يترفض .
– بسم الله الرحمن الرحيم وبه نستعين ، لطالما سعينا جميعاً لتكثيف جهودنا لخدمة المجتمع والارتقاء به ، ولكن حل مشاكل الدولة من توصيل مياه وتأمين أراضيها وغيرها كانت لها الأولوية ولكن الآن أرى بعيني مشروع متكامل وفيه أحقية أطفال الشوارع في التعليم وبصفتي رئيس جمهورية مصر العربية ..
بدأت أردد من جوايا – يارب اقف معايا يارب .
ابتسم الرئيس هو وبيكمّل كلامه – فأنا أوافق على هذا المشروع وسيتم مناقشته مع هيئة ال..
القاعه كلها بدأت تسقف والكاميرات بدأت تصور النقلة العظيمة في التعليم ، أما أنا ابتسمت لسيادة الرئيس وأنا من جوايا عاوز أصيح من فرحتي بس مكانتي كوزير متسمحليش ومن الوَقار إني أراعي تصرفاتي كويس ومَعملش تصرف يقلّ مني كوزير .
– مبروك يا سيادة الوزير وبإذن الله في مصر 2025 مشروع رؤية هيتنفذ على أرض الواقع ونشوف بعنينا كلنا مصر في رؤية جديده .
مِسكت المايك وشكرت سيادة الرئيس وسيبت كل الصحفيين والمصورين اللي حابين يعرفوا أكتر عن مشروع رؤية واتجهت بعربيتي لنفس المكان اللي كان اختلف كتير ومبقاش فاضي والعمارات اتبنت وبقا منطقه سكنيه بتطل على النيل .
– أنتَ مستني حد يا بيه؟
بَصيت في الساعه ولقيت إنه عدا 4 ساعات ورؤية لسه مَظهرتش .
نزّلت إزاز شباك العربية وأنا ببتسم وببصله – أيوة يا حاج بس شكله مش جاي .
الراجل بتاع حمص الشام مِشي وأنا فقدت الأمل في إني أشوف رؤية .
FLASHBACK:
ابتسمت – نفس اليوم ونفس المكان بعد عشرين سنه نتقابل هنا ووَقتها لو أنا مَجيتش تعرف إني فارقت الدنيا لكن لو جيت فأنا عاوزاك توفي بوعدك ليا .
BACK.
لسه بشغل العربية وهرجع لقيت حد بيخبط على إزاز العربية من الناحية التانيه .
نزّلت إزاز العربية وَبصيتلها باستغراب – نعم ؟
ابتسمت هي وبتعدّل حجابها – مناديل ، تاخد مناديل يا باشا؟
ابتسمت وأنا بردد – رؤيه !
” وقد تنتشلُكَ رؤيةٌ ما من قاعِ اليأسِ لتخطوَ أولى خطواتِك تجاه المجدِ ” 🤍
الست_نور.♡
