عليكي عيون

_عليكى عيون لا بتنافق ولا بتخون وفيها من الامل مخزون وفيها ما الجمال اسرار … عليكى كلام يمشى الحزن وابقى تمام يطمن قلبى يرجع خام واكون انا وانتِ كالاطفال

_ افندم !!!
بصيتلها بكل احراج الدنيا ما مش اسلوب بصراحة يعنى ايه انا اتحط فى الموقف ده
وسيبتها وقومت بسرعة ومشيت من الكافيه كله
يعنى بنت قمر كده قاعدة فى حالها يجى متطفل زيي يزعجها

…. كنت قاعدة ماسكة رواية بحبها وبشرب القهوة بتاعتى فى هدوء وسلام والاقى اخينا ده بيسحب كرسى وبيقعد يغنى وسابنى ومشى هو عبي”ط والا اي !! بس ده ميمنعش جمال صوته الصراحة ولا شعره احم احم اتلمى يا حَفصة وغضى بصرك استغفر الله العظيم يا رب والله مش قصدى وكملت قراية فى روايتى تانى

نرجع عنده …
مشيت فى الشارع واصحابى عمالين يتصلوا ومن الاحراج مش عايز ارد عليهم هما السبب اصلا
_ عايزين اي
بضحك _ اي يا بيضة اتكسفتى
_ هقفل فى وشك
_ طب خلاص خلاص روحت فين
_ انا برة لسة
_ طب استنى هنخرجلك
_ تمام
مفيش دقيقة وكانوا قدامى
كلهم بيضحكوا _ انتى مكسوفة
_ بس بقى بجد يخ”رب بيت احكامكوا لبيت اللى يلعب معاكوا تانى
بضحك _ خلاص يا معتصم متبقاش قفوش اومال
لا بس البت قمر وتستاهل يا عم تلاقيها حبت صوتك اصلا
بعصبية _ احترم نفسك يا نبيل
_ خلاص يا عم هتلاكلنى
_ ولا اكلك ولا حاجة يلا انا همشى بقى عندى انترفيو الصبح سلام
_ خد بس هنا انت زعلت بجد
_ مزعلتش والله يا نبيل بس فعلا الموقف محرج جدا وشايف البنت مختمرة وفى حالها شكلها محترمة جدا بتقول اي عليا اي دى دلوقتى الحكم ده سخيف جدا
_ ما تقول اللى تقوله هى هتشوفك تانى فين يلا مكانش حكم يلا نروح عشان كلنا عندنا شغل الصبح والا محدش غيرك هيروح يعمل انترفيو فى شركة كبيرة والا اي
ضحكت غصب عنى على شكله _ يا ابنى بس بقى

روح كل واحد على بيته وكلهم بيضحكوا جدا على الموقف وانا بصراحة مش محرج ده انا حاسس انى فى نص هدومى من وقتها بس يلا اهى عدت هى اه قمر وجميلة وصدمتها لما قعدت معاها قمرين احم احم اي يا معتصم فى اي فين غض البصر يا اخ مش كده بس تصدقوا عليها عيون فعلا يخر”ب بيت الجمال يا ترى هشوفها تانى !

صحيت الصبح بدرى كان عندى انترفيو مهم جدا وكمان مش فى مجال دراستى لا ده فى اكتر مجال بحبه مجال التصميم اترفضت من شركات كتير جدا ٥ شركات بما انى مش دارس تصميم بس يلا لما يشوفونى اكبر جرافيك ديزاينر فى المجرة والشركات بتترمى عليا ميبقوش يزعلوا
لبست اشيك بدلة عندى وهندمت شعرى ولحيتى وبرفانى كمان وبصيت لنفسى فى المرايا والله جمر جمر استعنى على الشقا بالله !!

خرجت لقيت امى فى الصالة ومحضرالى فطار فطرت وبوست راسها وفضلت تدعليلى ونزلت

روحت الشركة وفضلت منتظر اد كده بصراحة بس مفيش حاجة بتيجى بالساهل الحلم بردو يستحق الانتظار
لحد ما السكرتيرة ندهت أسمى يا ما انت كريم يا رب

دخلت وكانت اكبر صدمة ليا لما لقيتها قاعدة وهى اللى هتعمل الانترفيو يا حظك الاسود يا معتصم بقى تقع مع صاحبة شركة مش كانوا خمس شركات متزعلش بقوا ٦

_ هتفضل منتظر كتير يا استاذ اتفضل
قعدت وانا لسة فى صدمتى بس هى تقريبا مفتكرتنيش الحمد لله أو افتكرت ومش عايزة تحرجنى ايهما اقرب
تحرجنى اي هو انا ابن خالتها ما تحرجنى عادى بصوا معرفش معرفش

مسكت السي فى بتاعى قلبت فيه وبصتلى
_ مالكش اى خبرة عمل قبل كده
_ لا حضرتك خالص قدمت لكذا شركة بس اترفضت عشان مش دارس ديزاين
_ طب ليه مش شغال فى مجال دراستك مظنش شركات الأدوية هتقصر أو تفتح صيدلية
_ بصراحة أنا حابب جدا مجال الديزاينز ونفسى يبقى ليا كرير فيه لانى سايب مجال الصيدلة أو بالاخص انا مشتغلتش فيه اصلا عايز لما ابدا فيه ابدا بصيدلية بتعبى انا وده محتاج مبلغ وانا قررت اكونه وبردو اشتغل فى المجال اللى حبه
_ عجبتنى وجهة نظرك وبصراحة شغلك فى الملف فيه موهبة وإحساس اكتر من حد دارس ديزاين
وبعدها مديتلى أيدها بالملف مع ابتسامة _ بهنيك تم قبولك فى الوظيفة
مكنتش مصدق نفسى وعايز اقوم اصرخ كده بس لازم نحترم نفسنا كفاية اللى حصل امبارح
_ شكرا جدا لحضرتك عن اذنك

….. كنت قاعدة بعد يوم طويل مليان انترفيو لناس كتير انا كان مالى بالشغل اصلا كان لازم اعمل فيها استرونج اند بندنت ما كنت اتنيلت فى بيتى واتخرست شوية المهم لقيته داخل عليا نفس الشخص بتاع امبارح منكرش اتصدمت بس مكانش لازم أحرجه أو أحرج نفسى وعملت معاه الانترفيو عادى كاى حد ك اي ما هو فعلا اى حد فى اي يا حفصة مالك اتعدلى !!

نرجعله …
روحت بسرعة افرح امى واقولها انى اتقبلت فى الوظيفة
دخلت بزعق فى البيت من الفرحة _ يا مامااااا يا حووولم انا اتقبلت يا بشر اتقبلت فى الوظيفة

خرجت امى من المطبخ وهى بتضحك على جنانى _ ربنا ينولك اللى فى بالك يا ابنى
احلام اختى _ مين اشطر اخ فى المجرة
بخبث _ امممم مش عارف يمكن نبيل
اتكسفت وبصتلى وبصت لماما _ بصى يا ماما ابنك
حضنتها وانا بضحك ويدعى ربنا يكمل فرحتها على خير اه صحيح هى مخطوبة لنبيل صاحبى

عدى وقت كبير جدا وانا شغال فى الشركة وبصراحة بقى حبيتها يعنى قولولى بس مين يقدر يقاوم جمال ضحكتها اللى عمرها ما طلعتلى دى انا بلمحها بس كده وكمان طيبة جدا مرة كنت مروح وشوفتها بتراضى طفل كان بيعيط وهى متعرفوش اصلا لو هحكى عن مواقف من هنا الصبح مش هخلص
بس هى فين وانا فين دى بنت صاحب الشركة اللى انا شغال فيها هو اه محترم وكويس وعارف ربنا بس اكيد مش هيتهاون وعايز نفس المستوى اللى بنته عايشة فيه على الأقل ده لو مكانش اعلى
ابتديت اشتغل فى شركة أدوية شيفت مسائي والايام الاجازة بنزل فى صيدلية واى شغل بيجى قصادى بنزل المهم اجمع القدر إللى يخلينى اعرف اكلم باباها بس