رسالة مجهولة
الرسالة دي بتجيلي من جوزي كل يوم بسبب تأخيره في الشغل كنت بستغرب لان مش عادته؛
من بداية شهر رمضان وهو بيتأخر كنت بستغرب بس عادي شغله لانه بيجي يفطر، ويروح يكمل شغله ويجي قبل السحور بساعتين، الأيام دي كانت بالنسبة لي صعبة شوية لاني مش بحب أقعد في البيت لوحدي لأن بيجيلي تهيأت مش بحبها مش بتميز بين رمضان والأيام العادية، حاولت أنام لكن معرفتش فضلت ساعة مش عارفة أنام وقتها جه في تفكيري اني مش لوحدي وفي حد جنبي قُمت عملت قهوة، ورُحت قعدت في البلكونة طفيت النور بتاع البلكونة وقفلت الباب وقعدتك الشارع كان ضلمة مفيش غير عمود في أخره منور فجأة لقيت شَّخص ماشي كانت هيئته مش غريبة عليَّا شكلة مألوف بس مش عارفة مين،
دخل بيت في الشارع كانوا دايمًا بيقولوا إن البيت بيلم ناس مش كويسة كنت محتاجة أفعن مش كويسة ازاي؟! ولو هما مش كويسين ليه سايبنهم؟! مهتمتش لا بالبيت فضلت إني اركن فضولي على جنب اتجاه حاجة ممكن تأذيني، حسَّيت برجفة في جسمي من البرد دخلت وقفلت البلكونة كانت الساعة 1:55 إتوتَّرت جدًا من تأخير جوزي مسكت التليفون رنيت مردش عليَّا بعتله رسالة قولت :
ـ انت فين يا حبيبي؟! اتأخرت أوي عن معادك
= معلش يا حبيبتي خمس دقايق وأكون عندك
ـ ماشي خد بالك من نفسك
= حاضر يا حبيبتي..
سيبت التليفون جنبي على الكوميدينو، وقُمت واقفت قريب من الباب قلقانة هو مش بيحب السهر ولا التأخير برَّه دقايق وسمعت صوت مفتاح بيتحط في الباب عرفت أنه جه دخل وقفل الباب قربت منه استغربت من هيئته اللي كانت غريبة عينه كانت حمرا ومقفوله شوية وشعره كان منعكش قولت :
ـ ا… ايه ده عينك عاملة كده ليه؟!
= ده علشان الشغل…
ـ شغل ايه اللي يعمل فيك كده؟!
= من الصبح لحد دلوقتي في الشغل ومحتاج أنام مش أكتر، في ايه إنتِ هتقضيها تحقيق ولا ايه؟!
ـ ولا تحقيق ولا حاجة ثواني هحضر السحور علشان تنام
استغربت طريقه كلامه دي أول مرة يعمل كده، دخلت حضرت السحور ورجعت كنّا بنأكل وأنا ببص عليه شكله بيوحي أنه مش موجود في الواقع بيضحك بطريقة هستيرية وهو بيسمع فيلم على التلفزيون هيئته رعبتني كانت غريبة عليَّا جدًا، خلصنا اكل، ودخلنا علشان ننام صحى تاني يوم علشان يروح شغله وقفت قدَّامه قبل ما يمشي وقولت :
ـ ا… انت كويس؟!
= أيوة، في ايه يا حبيبتي مالك؟!
ـ كـ… كان مالك امبارح؟! كنت بتعمل حركات غريبة جدًا
= د… ده عادي يعني كنت عاوز أنام بس
ـ بس ايه علاقة نومك باللي حصل امبارح؟!
= مفيش يا حبيبتي كنت بضحك على الفيلم عادي عاوزة حاجة اجبهالك وأنا جاي؟!
ـ لا..
